Ərdoğan: “Türkiyənin Heç Kimin Bir Qarış Torpağında Gözü Yoxdur”

Türkiyənin heç kimin bir qarış torpağında gözü yoxdur.

APA-nın məlumatına görə, bu barədə Türkiyə prezidenti Rəcəb Tayyib Ərdoğan özünün “Twitter” səhifəsində yazıb.

“Əməliyyatı keçirməyimizdə əsas məqsəd Suriya xalqının təhlükəsizliyini təmin etmək, Suriyanın ərazi bütövlüyünün qorunmasına kömək etməkdir. İdlib və Afrində sülh və təhlükəsizlik bərpa edildikdən sonra, yüz minlərlə suriyalı qardaşlarımız öz evlərində rahat yaşaya biləcəklər. Region və Türkiyə üçün terror təhdidi aradan qaldırılmayanadək, insanların sülh içində yaşamaları üçün şərait yaradılanadək əməliyyatlarımız davam edəcək. Və Türkiyə bununla bağlı heç kimdən icazə almamalıdır”, Türkiyə prezidenti vurğulayıb.

Qeyd edək ki, yanvarın 21-dən Türkiyə Baş Qərargahı Afrin bölgəsində “Zeytun budağı” əməliyyatı başladığını, hərbi əməliyyatda məqsədin bölgənin PKK terror təşkilatının Suriya qolu PYD/YPG, İŞİD və digər terror təşkilatlarından təmizləmək olduğunu bəyan edib. Bir gün sonra isə Türkiyə ordusu Suriyanın Afrin bölgəsində quru əməliyyatına başlayıb.