Turkish
ABŞ hərbçilərinin türk ailələrinin uşaqlarını satın alıb öz ölkələrinə apardığı, adlarını, dinlərini dəyişdirdikləri ortaya çıxıb və bu fakt Türkiyədə böyük qalmaqala səbəb olub.
Oxu.Az-ın xəbərinə görə, bugünlərdə Türkiyənin Adana şəhərində iki qardaşın çox kiçik yaşlarda olarkən “İncirlik Üssü”ndə xidmət edən yüksək vəzifəli ABŞ-lı hərbçiyə pul qarşılığında satıldıqları ortaya çıxıb.
Bu fakt üzə çıxdıqdan sonra isə “İncirlik”də yaşayan digər türk vətəndaşları bununla bağlı açıqlamalar verməyə başlayıblar.
“İncirlik Üssü”ndə xidmət edən ABŞ-lı bir hərbçi qadının evinə gəlib, o zaman 1.5 yaşında olan qızını həyat yoldaşından pul qarşılığı istədiyini deyən Mahmut Açar mətbuata açıqlamasında bildirib:
“Həyat yoldaşım mənə ABŞ-lı qadın hərbçinin qızımı satın almağa gəldiyini söylədi. O an sanki beynimdən vurulmuşa döndüm. Bir insan övladını necə satar? Dünyanı versələr belə, övlad satılarmı? Övladını satan insanın dəli olması lazımdır. Ümumiyyətlə, ABŞ-lı hərbçilər pul qarşılığında çox sayda uşaq satın alıb, ölkələrinə aparırdılar. Yenə deyirəm, mənim qızımı da istədilər, amma vermədim, satmadım…”
