Turkish
28 May — sadəcə bir tarix deyil. Bu gün Azərbaycan xalqının azadlıq iradəsinin, dövlətçilik düşüncəsinin və milli qürurunun simvoludur. 1918-ci ildə qurulan Azərbaycan Xalq Cümhuriyyəti müsəlman Şərqində ilk demokratik respublika olaraq tarixə adını yazdı. O dövrdə atılan addımlar — azadlıq, müstəqillik və milli birlik ideyaları bu gün də Azərbaycanın inkişaf yolunun əsasını təşkil edir.
Cəmi 23 ay yaşamasına baxmayaraq, Azərbaycan Xalq Cümhuriyyəti xalqımıza sübut etdi ki, bu millət öz dövlətini qurmağa, qorumağa və idarə etməyə qadirdir. O illərdə qaldırılan üçrəngli bayraq zaman keçsə də xalqın yaddaşından silinmədi və illər sonra yenidən azad Azərbaycanın səmasında dalğalandı.
Müstəqilliyin bərpasından sonra Azərbaycan mürəkkəb və çətin dövrlərlə üz-üzə qaldı. Məhz belə bir zamanda ümummilli lider Heydər Əliyevin siyasi iradəsi və uzaqgörənliyi dövlətimizin dağılmasının qarşısını aldı, ölkədə sabitlik yaradıldı və müasir Azərbaycanın təməli möhkəmləndirildi. Heydər Əliyev Azərbaycanı yalnız bugünün deyil, gələcəyin dövləti kimi formalaşdırdı.
Bu siyasi kurs bu gün Prezident İlham Əliyev tərəfindən uğurla davam etdirilir. Son illərdə Azərbaycanın regionda güclənməsi, beynəlxalq nüfuzunun artması və ən əsası, 2020-ci ildə əldə olunan tarixi Zəfər xalqımızın birlik və qətiyyətinin nəticəsi oldu. 44 günlük Vətən müharibəsində Azərbaycan Ordusu Ali Baş Komandan İlham Əliyevin rəhbərliyi ilə torpaqlarımızı işğaldan azad etdi və illərlə davam edən ədalətsizliyə son qoydu. Qarabağda yenidən ucalan Azərbaycan bayrağı həm tariximizin qüruru, həm də gələcəyimizin simvoludur.
Bu gün müasir Azərbaycan keçmişinə sahib çıxaraq gələcəyini qurur. Çünki bir xalqın gücü yalnız iqtisadiyyatı və ordusu ilə deyil, öz tarixini unutmaması, şəhidlərini yaşatması və gələcəyinə inanması ilə ölçülür. Azərbaycan Xalq Cümhuriyyətindən başlayan yol bu gün daha güclü, daha müstəqil və daha qürurlu Azərbaycanla davam edir.
28 May— keçmişimizin şərəfi, bu günümüzün qüruru və gələcəyimizin ümididir. Yaşasın müstəqil Azərbaycan!
